കോൺഗ്രസ് സമുന്നത നേതാവ് രാഹുൽ ഗാന്ധിയെ കോട്ടയ്ക്കൽ ആര്യവൈദ്യശാലയിൽ പ്രവേശിപ്പിച്ചു. 7 ദിവസത്തെ ആയുർവേദ ചികിത്സയാണ് രാഹുലിനു വിധിച്ചിരിക്കുന്നത്. ഭാരത് ജോഡോ പദയാത്രയിലടക്കം അയ്യായിരത്തോളം കിലോമീറ്റർ പദയാത്ര നടത്തിയതിന്റെ ആരോഗ്യ പ്രശ്നങ്ങൾക്കു വിദഗ്ധ ചികിത്സയും പത്തു ദിവസത്തെ വിശ്രമവുമാണ് ലക്ഷ്യമെന്ന് എഐസിസി വൃത്തങ്ങൾ അറിയിച്ചു. സഹോദരനെ കാണാനും സുഖവിവരങ്ങൾ അന്വേഷിക്കാനും എഐസിസി ജനറൽ സെക്രട്ടറി പ്രിയങ്ക ഗാന്ധി നാളെ കോട്ടയ്ക്കലെത്തും.ഇന്നുരാവിലെയാണ് രാഹുൽ ഗാന്ധി കോട്ടയ്ക്കലെത്തിയത്. ഇന്നലെ പുതുപ്പള്ളിയിൽ ഉമ്മൻ ചാണ്ടിയുടെ സംസ്കാര ചടങ്ങുകളിൽ പങ്കെടുത്ത ശേഷം എറണാകുളത്തായിരുന്നു വിശ്രമം.