വെണ്ണിയോട് പാത്തിക്കല് കടവ് പാലത്തില് നിന്ന് കഴിഞ്ഞ 13നു കുഞ്ഞുമായി പുഴയില് ചാടി അമ്മയും കുഞ്ഞും മരിച്ചതിനിടയാക്കിയതു ഭര്ത്താവിന്റെയും കുടുംബാംഗങ്ങളുടെയും പീഡനമെന്നു മരിച്ച യുവതിയുടെ മാതാപിതാക്കളുടെ പരാതി. കണിയാമ്പറ്റ ചീങ്ങാടി വിജയമന്ദിരത്തില് വി.ജി.വിജയകുമാറിന്റെയും വിശാലാക്ഷിയുടെയും മകള് ദര്ശനയും (32), മകള് 5 വയസ്സുകാരി ദക്ഷയുമാണു മരിച്ചത്. ദര്ശനയുടെ ഭര്ത്താവ് വെണ്ണിയോട് അനന്തഗിരിയില് ഓംപ്രകാശ്, പിതാവ് റിഷഭരാജ്, മാതാവ് ബ്രാഹ്മില, സഹോദരി ആശ എന്നിവരാണ് മരണത്തിന് ഉത്തരവാദികളെന്നാണു വിജയകുമാറിന്റെയും വിശാലാക്ഷിയുടെയും ആരോപണം.13നു വൈകിട്ട് 3 മണിയോടെയാണു കീടനാശിനി കഴിച്ചതിനു ശേഷം, ഭര്ത്താവിന്റെ വീടിനു സമീപത്തെ വെണ്ണിയോട് വലിയ പുഴയിലേക്ക് ദര്ശന മകള് ദക്ഷയുമായി പുഴയിലേക്കു ചാടിയത്. നാട്ടുകാര് ദര്ശനയെ രക്ഷപ്പെടുത്തി ആശുപത്രിയില് എത്തിക്കുകയും പിന്നീട് ചികിത്സയ്ക്കിടെ ആശുപത്രിയില് മരിക്കുകയും ചെയ്തു. ദര്ശന 5 മാസം ഗര്ഭിണിയുമായിരുന്നു. കുട്ടിയുടെ മൃതദേഹം 3 ദിവസങ്ങള്ക്ക് ശേഷമാണു ലഭിച്ചത്. വിവാഹം കഴിഞ്ഞ് 6 മാസത്തിന് ശേഷം ഭര്ത്താവിന്റെ കുടുംബത്തില് നിന്നു മകള്ക്ക് ഏല്ക്കേണ്ടി വന്നതു കൊടിയ പീഡനമായിരുന്നുവെന്ന് ദര്ശനയുടെ മാതാപിതാക്കള് ആരോപിച്ചു. 2016 ഒക്ടോബര് 23നായിരുന്നു ദര്ശനയുടെ വിവാഹം.
