വട്ടിയൂർക്കാവ് : കനത്ത മഴയെത്തുടർന്ന് വെള്ളക്കെട്ടുണ്ടായ ഗൌരീശപട്ടം മേഖലയിൽ അഡ്വ. വി.കെ പ്രശാന്ത് എം.എൽ.എ മേജർ ഇറിഗേഷൻ ഉദ്യോഗസ്ഥരോടൊപ്പം സന്ദർശനം നടത്തി. എം.എൽ.എ യുടെ അദ്ധ്യക്ഷതയിലും ജില്ലാ കളക്ടറുടെ അദ്ധ്യക്ഷതയിലും ചേർന്ന അവലോകന യോഗങ്ങളിൽ കൈക്കൊണ്ട തീരുമാനങ്ങൾ പ്രകാരമുള്ള നടപടികളുടെ പുരോഗതി വിലയിരുത്താനാണ് സന്ദർശന പരിപാടി സംഘടിപ്പിച്ചത്. ഉള്ളൂർ തോടിന്റെ നവീകരണത്തിനുള്ള പ്രവൃത്തികൾ പുരോഗമിക്കുകയാണ്. മണ്ണും ചെളിയും നീക്കി തോടിന്റെ ആഴം കൂട്ടി പ്രവൃത്തി ത്വരിതഗതിയിൽ പൂർത്തിയാക്കാൻ എം.എൽ.എ നിർദ്ദേശം നൽകി. പട്ടം തോടിന്റെ നവീകരണത്തിനായുള്ള 4 കോടി രൂപയുടെ പ്രവൃത്തികളും ആരംഭിച്ചു. മേജർ ഇറിഗേഷൻ എക്സിക്യൂട്ടീവ് എഞ്ചിനീയർ ബിന്ദു, അസിസ്റ്റന്റ് എക്സിക്യൂട്ടീവ് എഞ്ചിനീയർ ബിജു,അസിസ്റ്റന്റ് എഞ്ചിനീയർ അനീഷ് എന്നിവർ പങ്കെടുത്തു.
