All Categories

Uploaded at 2 months ago | Date: 05/12/2019 10:47:43

തിരുവനന്തപുരം> തന്റെ മക്കൾ മണ്ണ്‌ തിന്നത്‌ പട്ടിണി കാരണമല്ലെന്ന്‌ ആവർത്തിച്ച്‌ കൈതമുക്കിലെ ആറ്‌ കുട്ടികളുടെ അമ്മ ശ്രീദേവി. ബുധനാഴ്ച തന്നെ സന്ദർശിച്ച കേന്ദ്ര ബാലാവകാശ സംരക്ഷണ കമീഷൻ അംഗം റോസി ടാബയോടാണ്‌ ശ്രീദേവി ഇക്കാര്യം വ്യക്തമാക്കിയത്‌. പ്രദേശത്തെ അങ്കണവാടി, ആശാ വർക്കർമാർ കൈതമുക്ക്‌ റെയിൽവേ പുറമ്പോക്കിലെ വീട്‌ സന്ദർശിച്ചിരുന്നു. അങ്കണവാടിയിൽനിന്ന്‌ കുട്ടികൾക്കുള്ള അമൃതം ന്യൂട്രിമിക്സും സമയാസമയം ലഭിച്ചിരുന്നു. ഭർത്താവിന്റെ ക്രൂരമർദനത്തിൽനിന്ന്‌ കുട്ടികളെ സംരക്ഷിക്കാൻ മാത്രമാണ്‌ മക്കളെ ഏറ്റെടുക്കണമെന്ന്‌ അധികൃതരോട്‌ ആവശ്യപ്പെട്ടത്‌. പ്രദേശത്തെ സിപിഐ എം, ഡിവൈഎഫ്‌ഐ പ്രവർത്തകരും സഹായം എത്തിച്ചിരുന്നു.

‘കുട്ടികൾ പട്ടിണി കിടക്കുന്ന സാഹചര്യം ഉണ്ടായിട്ടില്ല.കുട്ടികളിൽ ഒരാൾക്ക്‌ മണ്ണ്‌ തിന്നുന്ന സ്വഭാവമുണ്ട്‌. അത്‌ മാറ്റാനാകുന്നില്ല. കളിക്കുന്നതിനിടയിൽ അവർ മണ്ണ്‌ തിന്നുന്നത് അധികൃതർ കണ്ടതാണ്‌ തെറ്റിദ്ധാരണയ്ക്ക്‌ കാരണമായത്‌. ഇതാണ്‌ മാധ്യമങ്ങൾ  പ്രചരിപ്പിച്ചത്‌’. നുണപ്രചാരണങ്ങൾ ഏറെ വേദനിപ്പിച്ചതായും അവർ പറഞ്ഞു.

ഭർത്താവ്‌ തന്നെയും മക്കളെയും നിരന്തരമായി ഉപദ്രവിക്കുമായിരുന്നെന്നും അവർ പറഞ്ഞു. ‘മൂന്നാമത്തെ കുട്ടിയുടെ ജനനശേഷം പ്രദേശത്തെ ആശാ വർക്കർ വീട്ടിൽ എത്തുകയും ഗർഭനിരോധന മാർഗങ്ങൾ ചർച്ച ചെയ്യുകയും ചെയ്തു. അവരുടെ ഉപദേശപ്രകാരം വന്ധ്യംകരണ ശസ്ത്രക്രിയ ചെയ്യാൻ തീരുമാനിച്ചു. ഭർത്താവിന്റെ ക്രൂരമർദനമായിരുന്നു ഫലം. നാലാമത്തെ കുട്ടിയുടെ ജനനശേഷവും ഇതിന്‌ ശ്രമിച്ചു. ഭർത്താവിന്റെ എതിർപ്പിനെ തുടർന്ന്‌ പിൻവാങ്ങേണ്ടി വന്നു. ആറാമത്തെ കുട്ടിയുടെ ജനനശേഷം അടുത്തിടെയാണ്‌ പ്രസവം നിർത്തുന്നതിനുള്ള ശസ്ത്രക്രിയ നടത്തിയത്‌,’ ശ്രീദേവി പറഞ്ഞു.

ശ്രീദേവിയുടെ മുതിർന്ന നാല്‌ കുട്ടികളെ തിങ്കളാഴ്ച ശിശുക്ഷേമ സമിതി ഏറ്റെടുത്തിരുന്നു. സമിതിയിൽ ആറുവയസ്സ്‌ വരെയുള്ള കുട്ടികളെ മാത്രമേ നിർത്താനാകൂ. ഇത്‌ കൂടി പരിഗണിച്ച്‌ ശ്രീദേവിയെയും ആറ്‌ കുട്ടികളെയും ചൈൽഡ്‌ വെൽഫെയർ കമ്മിറ്റി ഇടപെട്ട്‌ ചൊവ്വാഴ്ച രാത്രി തന്നെ പുനലാൽ ഡെയ്‌ൽ വ്യൂ ഷെൽട്ടർ ഹോമിലേക്ക്‌ മാറ്റി. ജില്ലാ കലക്ടർ കെ ഗോപാലകൃഷ്ണൻ, സിഡബ്ല്യുസി ചെയർപേഴ്‌സൺ എൻ സുനന്ദ എന്നിവർക്കൊപ്പം ഇവിടെയെത്തിയാണ്‌ റോസി ടാബ ശ്രീദേവിയെ സന്ദർശിച്ചത്‌..

 

KERALA NEWS

SHARE THIS ARTICLE

advertisment .....

en24tv advertisment
 

copyrights © 2019 en24 tv   All rights reserved.